ბროდსკიმ იგი დოსტოევსკის შეადარა და ჯოისის, მუზილისა და კაფკას გვერდით დააყენა, მეორე მხრივ, იგი აშკარად იმსახურებს ადგილს ბეკეტისა და იონესკოს გვერდითაც. პლატონოვის გენია სტალინმაც კი დაინახა და დაწერა: „ნიჭიერი მწერალია, მაგრამ გარეწარი“; პლატონოვის გენიალური ქმნილებები „ჩევენგური“, „ქვაბული“ და „ჯანი“ თავისთავად ქმნიან ტრილოგიას, თუმცა ავტორს ისინი ასე არ გაუერთიანებია; პირველი უტოპიაა, მეორე – ანტიუტოპია, ხოლო მესამე „რწმენის გამოცდის“ ფეერია.

"ჩევენგური" პლატონოვის ერთადერთი დასრულებული რომანია. მწერალი მის სრულიად გამოქვეყნებას ვერ ეღირსა, რადგან ფაქტობრივად 80-იან წლებამდე რუსეთში აკრძალულ და ნიუღებელ ავრორად იყო გამოცხადებული.1972 წელს გამოცემულმა "ჩევენგურის" იტალიურმა თარგმანმა პიერ პაოლო პაზოლინის აღფრთოვანება გამოიწვია. ამ წიგნში მთავარი გმირი, ალექსანდრ დვანოვი "მოსახლეობის თვითშემოქმედებაში კომუნიზმის საძებნელად" გაემართა და რევოლუციის მოგზაურ რაინდად დონ კიხოტად იქცა. ხოლო მისი დულსინეა ტობოსელად როზა ლუქსემბურგი მოგვევლინა.

"ქვაბული" ერთდროულად დისტოპიაცაა, სოციალური იგავიც, ფილოსოფიური გროტესკიც და პირველი ხუთწლედის პერიოდის საბჭოთა კავშირის სასტიკი სატირაც. "საერთოპროლეტარული სახლის" მშენებლობა, რომლის მიზანიცაა, მომავლის უტოპიური ქალაქის პირველი აგური გახდეს. მთავრდება მომავლის სახლის ფუნდამენტის ქვაბულის მშენებლობით, საქმე უფრო შორს ვერ მიდის და მშენებლები ხვდებიან, რომ ვერაფერ ახალს ვერ შექმნიან განადგურებული ძველის ადგილზე.

"ჯანის" სიუჟეტს ბევრი მკვლწევარი "კაცობრიობის გადარჩენის სიუჟეტად" ნათლავს, რომლის ცენნტრშიც მთავარი გმირი, ნუგზარ ჩაგატაევი დგას. იგი ერთდროულად ატარებს ესქილეს პრომეთევსისა და ბიბლიური მოსეს ნიშნებს. პირველმა ადამიანებს ცეცხლი და დამწერლობა მოუტანა, მეორემ კი თავისი ხალხი უდაბნოდან გამოიყვანა და "მკვდარი უდაბნო სამოთხედ აქცუია". ახალი მოსე ცდილობს ხალხს რწმენის კიდევ ერთი აღთქმა მისცეს.