გიორგი სიჭინავა – ართ შურიშ ეშაკაშუათ ვეკირაგადენ ფერი ფიგურა რე მარგალურ ნინაშო, მარგალურ ჭარალუაშო. მითინიშ გურშენ ქირაგადე, მარგალურ ნინას დო ნინაშ გინოსქილიდაფაშ საქვარს ძეკვენცალო ათუდირთუავა-და, თენა ირკოჩიშ წოხლე გიორგი სიჭინავა რე. გიორგი სიჭინავაქ ერჩქინდჷ 1942 წანას დარჩელს, ზუგდიდიშ რაიონს. 1966 წანაშე ოხორანდჷ სოხუმს, სოდეთ ლიტერატურულ საქვარუაშა მეუთხუდჷ ხე დო რედაქტორენდჷ ჟურნალ „რიწას“ დო გაზეთი „აღდგომას“. ლიმაშ უკულ, სოხუმქ კინატებელქ აჸუ დო ფანიაწკუმა ართო ქართის ქიდიხორჷ. თეშმადიდა ტრაგედიაშ უმკუჯინუო, სიჭინავას აკამერქას ვაშუბირგულუაფჷ დო 1996 წანაშე ქიდიჭყუ ჟურნალ „აია“-შ გიშაშქუმალა, ნამუთ თი წანეფს მარგალურ ნინაშა ნაჭარა ლიტერატურაშო ქვერსემი პლატფორმა რდჷ დო თე ნინაშ თხილუაშ დო ადვოკატირაფაშ ფორპოსტი გოხოლუდეს. უკული რდუ „ირიათონი“, მარგალურნინამი ლიტერატურული ჟურნალი, შხვადოშხვა წინგეფი მარგალურ ნინაშა: „ნანაგე“, „რინა მოკო პელაზგური“, „შურობუმუ“ დო შხვა. გიშაკერზაფილო შინუაშ ღრისიე ტრილოგია „უტუ მიქა“ ქორთულ ნინაშა, ნამუთ მარგალურო ყოფჷ დუდშე ჭარილი დო ათე შვანს მარგალურ ვერსიაშ გოთინუაშო ხანდენს ავტორი. „მარგალურ ნინაშ ასოციაცია“-ს ულამჷ „უტუ მიქა“-შ მარგალურ ტრილოგიაშ გიშაშქუმალა მუჭოთ ხაზირ ქიჸუაფუნ ხეთე. ათე წინგის დუდი აკუჭოფით გიორგი სიჭინავაშ მარგალურ პროზა დო პოეზიას, მინიატურეფს დო შხვა ტიპიშ ნაჭარეფს, ირფელს, მუთ ამდღარშახ მარგალურ ნინაშა აფუდჷ ჭარილინ. წყარი ვეკლურსინ თეშ ჯგირი ნაკორობაქ გიშართჷ დო მაკითხე თეს მუშ თოლით ხოლო ქოძირუნს. გიორგი სიჭინავას მიარე წანეფს სინთელუანო რინას ვუზალანთ მუშ ფანიაწკუმა ართო. გივი გ. ქარჩავა